曼聯Boxing Day做聖誕老人,主場迫和般尼,賽後摩帥話3億唔夠爭冠單 – Men 男人墟|Go idea

曼聯Boxing Day做聖誕老人,主場迫和般尼,賽後摩帥話3億唔夠爭冠單 – Men 男人墟|Go idea

Boxing Day英超曼聯又做聖誕老人,紅魔主場迎戰般尼,未踢完上半場就已經輸緊2球,而下半場後備入替伊巴謙莫域嘅連加特梅開二度,幫紅魔追番2比2。曼聯呢一場和波,曼城有好大機會再可以領放得更遠之外,同時間畀贏波嘅車仔追到得番一分嘅距離1分,摩連奴真係要諗諗計喇!

曼聯今場排陣出4-2-3-1,出伊巴謙莫域拍住盧卡古打進攻中場同中鋒,不過摩帥個如意算盤未打響就失波。開波2分鐘,被般尼嘅艾殊利班尼斯(Ashley Barnes)喺門前混戰中射入。其後曼聯搶番唔少攻勢,控球指數亦都達到7成,不過般尼再喺36分鐘入多粒,由迪科(Steven Defour)主射罰球搞掂迪基亞,攞住2球的優勢完上半場。

下半場一開波,曼聯作出換人調動,換走伊巴同埋盧祖,換入連加特同埋米希達恩增強攻力,結果終於喺53分鐘嘅時候,連加特用後腳入波,追成1:2。去到臨完場前補時1分鐘,連加特梅開二度,協助曼聯追和2比2,結果曼聯喺主場再跌多兩分,暫時仲守得住個第2位。不過排第3嘅車路士憑住莫拉達同埋阿朗素嘅入波,主場淨勝白禮頓兩球,呢家僅僅落後曼聯1分。

今個聖誕「紅魔鬼」都算頭頭碰著黑,聯賽盃爆大冷輸畀英冠嘅布里斯托城出局之後,英超快車仲要連續兩場比人迫和2比2,跌咗4分,紅魔Boxing Day必贏嘅傳統亦都冇埋,摩帥喺逼和般尼之後又發表偉論,佢就話:「3億鎊(折合約30億港元)係唔夠曼聯去爭冠軍,唔夠同曼城鏈。」

其實摩帥入魔兩年,已經駛咗2.6億鎊去買人,不過睇黎呢個數,佢覺得仲未夠:「大球會就係大球會,買人就係要駛多啲錢,所以凡係大球會喺轉會市場入面,都係好唔著數。」一講到同死敵曼城嘅競爭,佢就話:「曼城用緊買前鋒嘅價錢去買後衞,我哋要鏈贏曼城,3億真係唔夠。」

Photo Source: Getty Image

 


Related Posts

英超又排第一!球員身價升幅榜,沙拿差不多升了一倍!– Men 男人墟|Go idea

英超又排第一!球員身價升幅榜,沙拿差不多升了一倍!– Men 男人墟|Go idea

過去半年,歐洲五大聯賽身價上漲最多的球員是誰?著名足球數據統計機構CIES給了答案。 Related

米勞列要走?利物浦出4000萬搶英國門神,阿仙奴都想爭!– Men 男人墟|Go idea

米勞列要走?利物浦出4000萬搶英國門神,阿仙奴都想爭!– Men 男人墟|Go idea

據《每日鏡報》報導,利物浦想以4000萬鎊鎖定史篤城門將積克巴特蘭。 Related



男人墟