[足球趣事]5個未打過世界盃決賽週嘅球皇!個中原因你估都估唔到!- Men|Go idea

[足球趣事]5個未打過世界盃決賽週嘅球皇!個中原因你估都估唔到!- Men|Go idea

世界盃外圍賽經已打左大半,當中有好多球星(山齊士、加利夫巴爾、奧巴美揚、洛賓等)都注定無緣參加出年於俄羅斯舉辦嘅決賽週賽事。但你又知唔知,係足球歷史上,有幾個球皇級數嘅人馬居然連世界盃決賽週都未打過!?一齊黎睇睇~

#5 簡東拿 (Eric Cantona)

Sportzwiki

有奧脫福大帝之稱嘅簡東拿,喺90年代英國球壇叱吒風雲,1987年首次代表法國上陣,一年後因為對當時法國國家隊教練(Henri Michel)做出侮辱言論而被無限期趕出國家隊。3年後重新被征召嘅佢喺1994年世界盃外圍賽對陣保加利亞落敗而失去決賽週參加資格(當時只需要和波就可以出線),雖然佢後來更被委任為國家隊隊長,但因為係曼聯對水晶官一場比賽上,飛腳踢向球迷而被罰停賽9個月,連1998年世界盃都無份打,遺憾嘅係,98世界盃冠軍正正係法國。

#4 傑斯 (Ryan Giggs)

Daily Mirror

又一個曼聯球員,傳奇左翼傑斯幫助曼聯贏得11次英超冠軍、2次歐聯、4次聯賽盃等球隊獎項,仲拎過無數個人榮譽,作為英國足壇最成功嘅足球員之一,但就未曾打過一屆世盃決賽週。好多人都話如果佢當年選擇入籍英格蘭而唔係威爾士,佢嘅成就絕對唔會止於球會層面。

#3 佐治韋亞 (George Weah)

Getty images

利比亞人佐治韋亞可能係歷史上最偉大同最成功嘅非洲球員。喺巴黎聖日耳門同AC米蘭嘅足球生涯令佢成為一時無兩嘅傳奇巨星,拎過世界足球先生(1995年)、歐洲足球先生(1995年)以及非洲足球先生(1995年)。但係佢代表嘅利比亞國家隊就未試過打到決賽週。

#2 佐治貝斯 (George Best)

Raw images

唔係小編專登,但佢又係另一個曼聯球員,1968奪得世界足球先生嘅曼聯傳奇佐治貝斯,曾經幫後者攻入186球並兩度奪得英足聯賽冠軍(前英超),但多年嚟因為酗酒同毒品問題令到佢嘅足球事業蒙上陰影,更一度要偷錢買酒而坐過監。貝斯曾經38次代表北愛爾蘭上陣,並攻入9球,但就未嘗踏足世界盃決賽週聖地。

#1 迪史堤芬奴 (Alfredo Di Stefano)

RealMadrid.com

相信好多皇馬迷唔會對呢個名感到陌生,因為佢曾經被阿根廷球皇馬勒當拿評為「歷史最佳」,作為皇馬榮譽主席,曾經帶領銀河艦隊稱霸歐洲,效力皇馬期間贏左大大小小15獎項,當中包括8次聯賽冠軍同5次歐洲冠軍杯(歐聯前身),又兩奪金球獎殊榮。

eurosport.com

迪史堤芬奴嘅國家隊生涯亦充滿傳奇,佢曾經效力過3支國家隊(阿根廷、哥倫比亞及西班牙),但就因為政治、傷病同衰運,令到佢從未book過一張去決賽週嘅機票。早年因為阿根廷足協拒絕佢加入國家隊而無緣1950年世界盃,隨後又因為轉籍哥倫比亞而被FIFA禁止佢參與1954年世界盃。1958年迪史堤芬奴正式成為西班牙公民而加入西班牙國家隊,但天意弄人,西班牙並未能夠於1958世界盃外圍賽報捷。最終皇天不負有心人,迪史堤芬奴終於協助西班牙打入1962年世界盃決賽週,但咁啱喺開賽前因為一次肌肉拉傷而令佢無法參賽,最後佢選擇係62年世界盃後退出國家隊。

 


Related Posts

隊長回歸!路維:世界盃肯定有紐亞!最強德國隊列陣!– Men 男人墟|Go idea

隊長回歸!路維:世界盃肯定有紐亞!最強德國隊列陣!– Men 男人墟|Go idea

德國國家隊教練路維指,球隊明年夏天會到俄羅斯出戰世界盃時,必定需要隊長紐亞在陣。 Related

一代傳奇球員!拿姆獲得榮譽隊長頭銜!幾時執教德國隊呀?– Men 男人墟|Go idea

一代傳奇球員!拿姆獲得榮譽隊長頭銜!幾時執教德國隊呀?– Men 男人墟|Go idea

今年34歲嘅前德國國家隊及拜仁慕尼黑隊長拿姆,獲得德國足總頒授榮譽隊長頭銜,同時亦會協助德國申辦2024年歐洲國家盃。 Related



男人墟