[男人老講] 陳偉霆— 由「的士陳」蛻變成「全能男神」! 一種「而我不知道」的勵志! – Men|Go idea

[男人老講]  陳偉霆— 由「的士陳」蛻變成「全能男神」! 一種「而我不知道」的勵志! – Men|Go idea

俗語話唔怕生壞命,最怕改壞名。

老實講,係娛樂圈唔怕講錯野,最怕唱錯歌。老蕭當年串老麥「邪不能勝正」,雪足10年都可以起死回生,而唱盡好歌既林峯,紅遍東南亞,當年憑住一首「愛在回憶中找你」係娛圈隻手遮天,可惜天意弄人,因為一首「Chok」係十大中文拎金曲金獎,嚇到曾志偉、王苑之班人屎都飇埋,就咁將林峯Chok出香港,Chok到家陣連影都無埋。同樣,本來以為生得青靚白淨,又唱得又跳得既陳偉霆(下稱阿霆)可以係娛圈飛黃騰達,殊不知一開波就仆到直一直,一首經典金曲 Taxi 令佢一夜爆紅 !被賦予「的士陳」既稱號。好,唱歌唔掂,拍住戲先~於是轉行拍戲既阿霆,居然演技好到12-14年連續3年登上金話梅電影選舉最佳男主角,可謂一時無兩,前無古人!

wikia.com

正當大家以為的士陳既娛圈事業已經型到盡頭,佢再同大家開左個玩笑,竟敢挑機有「大陸韋小寶」之稱既黃曉明,同人地爭女(Angelababy)。成頂綠帽笠落個頭不特止,仲要俾曉明哥語重心長咁講左句「而我不知道陳偉霆是誰」將的士陳勸退。此句一出,即時被高登仔爭相揶揄嘲諷,二次創作連番推出,「不知道陳偉霆是誰」一句成為當時佳話,更榮獲2011年高登網路潮語獎。以不知陳偉霆是誰既改篇既歌曲更唱到街知巷聞,繞樑三日(月)!

wikia.com

wikia.com

阿霆面臨事業、愛情兩失意,開始明白香港係一個留唔住佢既地方,佢要揚名海外,要報返呢頂綠帽既仇!於是佢離開左呢個孕育佢成長既傷心地,北上屬於黃曉明既根據地,誓要將本來係自己既野搶返黎。而皇天不負有心人,經過多年打拼,阿霆終於練成一身好演技,捱到做男主角,憑劇集《古劍奇譚》大師兄一角係大陸爆紅,自此阿霆拍親劇集都做男主角,演藝事業如日中天。但佢不滿於此,覺得係邊度仆直,就要係邊度企返起身!為左要擺脫「香港舞皇」、「郭富城接班人」、「的士佬」同埋「的士陳」等令人敬畏既稱號,幾年黎佢不停搞個唱,門票熱到發售一分鐘就被掃晒,年僅32歲既佢,成為左中國女性最喜愛既小鮮肉,仲封左個「全能男神」俾佢添~

的士陳…唔係,陳偉霆既故事真係好勵志,好感動!人地話「英雄莫問出處」,要知道人生總要跌幾回,如果可以型到阿霆咁樣,由寂靜無名做到今年升埋上中國富豪榜第21位(年收入1200萬人仔),拍一套劇一億,真係型多幾百回都制~

yangfenzi.com

 



男人墟